【正式宣佈港女真係世界級】
由六月到依家，每個禮拜六日發夢個太陽都曬正頭蓋頂，一路行，啲汗就一路流，流到底褲都榨到水；個bra又貼住晒皮膚，醃住啲汗，搞到起敏感，好痕...但偏偏港女唔怕，好多人求其束起頭髮，著上黑色短袖衫、legging，由頭包到落腳，背負住保護香港嘅使命去抗爭。
「光復香港 時代革命 五大訴求 缺一不可！」
望望隔離，又見到一個戴住護目鏡嘅女仔喺灰色口罩下，一邊抖氣，一邊竭力咁大嗌。聽得出佢原本把聲好溫柔，為咗叫口號嗌到把聲沙晒，好彩嗌咗兩次慢慢愈來愈多人呼應佢...
「走呀！出旗呀！走呀！」
一個、兩個、三個、四個、五個、六個、七個...十二個...仲嚟！？仲要掟幾多個先夠，嗰啲係我哋納稅人出錢㗎！點解要用我哋啲每晚捱更抵夜，睇醫生都驚被老闆鬧，返工返到嘔血嘅血汗錢，去謀殺我哋呀？
就喺大家用盡全力逃命之際，有幾個黑色嘅細小身影反方向咁跑。原來佢哋都係瘦到仆街嘅女仔，見住佢哋個個手腳幼到好似一啪就斷，好易就被風吹走咁，但喺最危險嘅時候竟然不顧一切衝上前線...你問佢哋唔怕中彈咩？怕。你問佢哋唔怕被人出言侮辱、趁亂亂摸咩？怕。你問佢哋唔怕被人告到坐10年咩？更加怕！咁點解佢哋仲要去？
因為我哋唔衝，香港就會玩完，送中等於送終。
無論係喺天水圍被扯高條裙嘅街坊、尖沙咀被騎坐嘅空姐、被布袋彈射中眼致盲嘅first aid、喺背脊貼上罷工標語嘅女學生、喺連儂牆前面被斬傷嘅記者...定係有份發夢、捐錢嘅你，都係有良心嘅人。呢啲女仔識分對錯，頭腦聰穎，一定係個好老婆！
各位港男，港女真係痴線咁高質，如果老咗同佢哋一齊回憶點抗爭都咪話唔溫馨，你話係咪？
#Eye4HK
#EyeforHK
#NoPoliceBrutality
#FreeFromFear
#DemocracyForHK
Search